ਸਾਊਦੀ ਅਰਬ ਨੇ ਉਰੂਗਵੇ ਦੀਆਂ ਉਮੀਦਾਂ 'ਤੇ ਫੇਰਿਆ ਪਾਣੀ, ਅਰਜਨਟੀਨਾ ਨੂੰ ਹਰਾਉਣ ਤੋਂ ਬਾਅਦ ਉਰੂਗਵੇ ਖਿਲਾਫ਼ ਖੇਡਿਆ 1-1 ਨਾਲ ਡ੍ਰਾਅ ਮੈਚ

ਮਿਆਮੀ ਗਾਰਡਨਜ਼(ਏਪੀ) : ਸਾਊਦੀ ਅਰਬ ਦੀ ਟੀਮ ਜਿਸ ਨੇ 2022 ਵਿਸ਼ਵ ਕੱਪ ’ਚ ਅਰਜਨਟੀਨਾ ਨੂੰ ਹਰਾ ਕੇ ਵੱਡਾ ਉਲਟਫੇਰ ਕੀਤਾ ਸੀ, ਨੇ ਮੰਗਲਵਾਰ ਸਵੇਰੇ ਖੇਡੇ ਗਏ ਮੈਚ ’ਚ ਦੋ ਵਾਰ ਦੇ ਚੈਂਪੀਅਨ ਉਰੂਗਵੇ ਨੂੰ ਅਸਲ ਉਲਟਫੇਰ ਦਿੱਤਾ। ਜੇਕਰ ਮੈਕਸੀ ਅਰਾਉਜੋ 80ਵੇਂ ਮਿੰਟ ’ਚ ਗੋਲ ਨਾ ਕਰਦਾ, ਤਾਂ ਸਾਊਦੀ ਅਰਬ ਆਪਣੇ ਪਹਿਲੇ ਹੀ ਮੈਚ ’ਚ ਇੱਕ ਹੋਰ ਵੱਡਾ ਉਲਟਫੇਰ ਕਰਨ ਦੀ ਸਥਿਤੀ ’ਚ ਹੁੰਦਾ। ਸਾਊਦੀ ਅਰਬ ਲਈ ਅਬਦੁਲੇਲਾਹ ਅਲ-ਅਮਰੀ ਨੇ 41ਵੇਂ ਮਿੰਟ ’ਚ ਰੀਬਾਉਂਡ ’ਤੇ ਗੋਲ ਕੀਤਾ।

ਉਰੂਗਵੇ ਨੇ ਦੂਜੇ ਹਾਫ ’ਚ ਜ਼ਿਆਦਾਤਰ ਦਬਦਬਾ ਬਣਾਇਆ, ਪਰ ਸਾਊਦੀ ਅਰਬ ਦੀ ਰੱਖਿਆ ਮਜ਼ਬੂਤੀ ਨਾਲ ਚੱਲੀ। ਅੰਤ ’ਚ ਮੈਕਸੀ ਨੇ ਗੋਲਕੀਪਰ ਮੁਹੰਮਦ ਅਲ-ਓਵੈਸ ਨੂੰ ਪਛਾੜਦੇ ਹੋਏ, ਇਕ ਰੀਬਾਉਂਡ ਨੂੰ ਗੋਲ ’ਚ ਬਦਲ ਦਿੱਤਾ। ਉਰੂਗਵੇ ਨੇ ਪੂਰੇ ਮੈਚ ਦੌਰਾਨ ਗੇਂਦ ’ਤੇ ਵਧੇਰੇ ਕੰਟਰੋਲ ਬਣਾਈ ਰੱਖਿਆ। ਉਨ੍ਹਾਂ ਨੇ ਸਾਊਦੀ ਅਰਬ ਦੇ ਸੱਤ ਦੇ ਮੁਕਾਬਲੇ ਗੋਲ ’ਤੇ 28 ਕੋਸ਼ਿਸ਼ਾਂ ਕੀਤੀਆਂ।

ਅਲ-ਅਮਰੀ ਨੇ ਸਾਊਦੀ ਅਰਬ ਨੂੰ ਅਗੇਤ ’ਚ ਰੱਖ ਕੇ ਉਰੂਗਵੇ ਦੇ ਪ੍ਰਸੰਸਕਾਂ ਨੂੰ ਹੈਰਾਨ ਕਰ ਦਿੱਤਾ। ਉਰੂਗਵੇ ਦੇ ਫਰਨਾਂਡੋ ਮੁਸਲੇਰਾ ਨੇ ਸ਼ੁਰੂ ’ਚ ਅਲ-ਅਮਰੀ ਦੇ ਸ਼ਾਟ ਨੂੰ ਨੈੱਟ ਤੋਂ ਬਾਹਰ ਰੱਖਣ ’ਚ ਕਾਮਯਾਬੀ ਹਾਸਲ ਕੀਤੀ ਪਰ ਗੇਂਦ ’ਤੇ ਕਾਬੂ ਰੱਖਣ ’ਚ ਅਸਫਲ ਰਹੇ, ਅਲ-ਅਮਰੀ ਨੇ ਗੋਲ ਕਰਨ ਤੇ ਆਪਣੀ ਟੀਮ ਨੂੰ ਅਗੇਤ ਦਿਵਾਉਣ ਲਈ ਤੇਜ਼ੀ ਨਾਲ ਪ੍ਰਤੀਕਿਰਿਆ ਦਿੱਤੀ। ਗੋਲ ਕਰਨ ਤੋਂ ਬਾਅਦ ਅਲ-ਅਮਰੀ ਆਪਣੇ ਗੋਡਿਆਂ ਭਾਰ ਡਿੱਗ ਪਿਆ ਤੇ ਆਪਣਾ ਸਿਰ ਜ਼ਮੀਨ ’ਤੇ ਝੁਕਾਇਆ। ਉਸ ਦੀ ਕੋਸ਼ਿਸ਼ ਨੇ ਸਾਊਦੀ ਅਰਬ ਦੇ ਪ੍ਰਸ਼ੰਸਕਾਂ ਨੂੰ ਇੱਕ ਜਨੂੰਨ ’ਚ ਪਾ ਦਿੱਤਾ। ਹਾਲਾਂਕਿ ਦੱਖਣੀ ਫਲੋਰੀਡਾ ’ਚ ਖੇਡੇ ਗਏ ਮੈਚ ਲਈ ਸਟੇਡੀਅਮ ’ਚ ਬਹੁਤ ਘੱਟ ਸਾਊਦੀ ਪ੍ਰਸੰਸਕ ਸਨ, ਪਰ ਉਨ੍ਹਾਂ ਦੇ ਵੋਕਲ ਸਮਰਥਨ ਨੇ ਗਿਣਤੀ ਦੀ ਘਾਟ ਨੂੰ ਪੂਰਾ ਕੀਤਾ।

ਉਰੂਗਵੇ ਨੂੰ ਗੋਲ ਕਰਨ ਦੇ ਕਈ ਮੌਕੇ ਮਿਲੇ। ਪਹਿਲੇ ਅੱਧ ’ਚ ਅਲ-ਓਵੈਸ ਨੇ ਫੈਡਰਿਕੋ ਵਿਨਸ ਦੇ ਇਕ ਨਜ਼ਦੀਕੀ ਹੈਡਰ ਨੂੰ ਅਸਫਲ ਕੀਤਾ। ਇਸ ਤੋਂ ਬਾਅਦ ਉਸ ਨੇ 61ਵੇਂ ਮਿੰਟ ’ਚ ਮੈਨੂਅਲ ਉਗਾਰਟੇ ਤੇ ਸਟਾਪੇਜ ਟਾਈਮ ਦੌਰਾਨ ਫੈਡਰਿਕੋ ਵਾਲਵਰਡੇ ਦੇ ਯਤਨਾਂ ਨੂੰ ਵੀ ਅਸਫਲ ਕਰ ਦਿੱਤਾ। ਇਹ ਮੈਚ ਵਿਸ਼ਵ ਕੱਪ ਇਤਿਹਾਸ ਦੇ ਅਤੀਤ, ਵਰਤਮਾਨ ਤੇ ਭਵਿੱਖ ਦੇ ਟਕਰਾਅ ਨੂੰ ਦਰਸਾਉਂਦਾ ਸੀ। ਉਰੂਗਵੇ ਨੇ 1930 ’ਚ ਪਹਿਲੇ ਵਿਸ਼ਵ ਕੱਪ ਦੀ ਮੇਜ਼ਬਾਨੀ ਕੀਤੀ ਸੀ ਤੇ ਟੂਰਨਾਮੈਂਟ ਦੀ ਸ਼ਤਾਬਦੀ ਮਨਾਉਣ ਲਈ 2030 ’ਚ ਇਕ ਮੈਚ ਦੀ ਮੇਜ਼ਬਾਨੀ ਕਰਨ ਲਈ ਤਿਆਰ ਹੈ, ਜਦ ਕਿ ਸਾਊਦੀ ਅਰਬ 2034 ’ਚ ਵਿਸ਼ਵ ਕੱਪ ਦੀ ਮੇਜ਼ਬਾਨੀ ਕਰਨ ਵਾਲਾ ਹੈ। ਫੀਫਾ ਦੇ ਪ੍ਰਧਾਨ ਗਿਆਨੀ ਇਨਫੈਂਟੀਨੋ, ਮਿਆਮੀ ਹੀਟ ਸਟਾਰ ਬਾਮ ਅਦੇਬਾਯੋ, ਸਾਬਕਾ ਐੱਨਐੱਫਐੱਲ ਸਟਾਰ ਚਾਡ ਓਚੋਸਿੰਕੋ ਤੇ ਉਰੂਗਵੇ ਫੁੱਟਬਾਲ ਸਟਾਰ ਲੁਈਸ ਸੁਆਰੇਜ਼ ਵੀ ਮੈਚ ਦੇਖਣ ਲਈ ਮੌਜੂਦ ਸਨ।

ਗੋਲ ਸਕੋਰ

ਸਾਊਦੀ ਅਰਬ: 1

ਅਬਦੁੱਲਾ ਅਲ-ਅਮਰੀ: 41ਵਾਂ ਮਿੰਟ

ਉਰੂਗਵੇ: 1

ਮੈਕਸੀ ਅਰਾਉਜੋ: 80ਵਾਂ ਮਿੰਟ

ਸਾਊਦੀ ਅਰਬ ਉਰੂਗਵੇ

35% ਬਾਲ ਨਿਯੰਤਰਣ 65%

7 ਕੁੱਲ ਸ਼ਾਟ 27

ਟਾਰਗੇਟ ’ਤੇ 3 ਸ਼ਾਟ 10

313 ਕੁੱਲ ਪਾਸ 528

11 ਫਾਊਲ 6

4 ਕਾਰਨਰ 14

1 ਪੀਲੇ ਕਾਰਡ 0

0 ਲਾਲ ਕਾਰਡ 0