ਪੰਜਾਬ ਤੋਂ UK ! ਬਿਨਾਂ ਵੈਲਿਡ ਵੀਜ਼ਾ ਦੇ ਕੌਣ ਭੇਜ ਰਿਹਾ? ਪਤਾ ਲਗਾਏਗੀ SIT, ਸੰਗਠਿਤ ਨੈੱਟਵਰਕ ਦੀ ਜਾਂਚ ਸ਼ੁਰੂ
ਮਾਮਲੇ ਵਿੱਚ ਸ਼ਾਮਲ ਟ੍ਰੈਵਲ ਏਜੰਸੀਆਂ ਦੀ ਪਛਾਣ ਪਹਿਲਾਂ ਹੀ ਹੋ ਚੁੱਕੀ ਹੈ, ਜਿਸ ਤੋਂ ਬਾਅਦ ਹੁਣ ਪੂਰੇ ਨੈੱਟਵਰਕ ਦੀ ਡੂੰਘਾਈ ਨਾਲ ਪੜਤਾਲ ਸ਼ੁਰੂ ਕਰ ਦਿੱਤੀ ਗਈ ਹੈ। ਅਧਿਕਾਰੀਆਂ ਦਾ ਮੰਨਣਾ ਹੈ ਕਿ ਇਹ ਮਾਮਲਾ ਇੱਕ ਸੰਗਠਿਤ ਅਤੇ ਸੁਨਿਯੋਜਿਤ ਰੈਕੇਟ ਦਾ ਹਿੱਸਾ ਹੈ, ਜਿਸ ਦੀਆਂ ਜੜ੍ਹਾਂ ਪੰਜਾਬ ਤੋਂ ਬਾਹਰ ਦੇਸ਼ ਦੇ ਕਈ ਹਿੱਸਿਆਂ ਤੱਕ ਫੈਲੀਆਂ ਹੋ ਸਕਦੀਆਂ ਹਨ।
Posted By Seema Anand
Publish Date: Tue, 28 Apr 2026 01:52 PM (IST)
Updated Date: Tue, 28 Apr 2026 02:52 PM (IST)
ਜਾਗਰਣ ਪੱਤਰਕਾਰ, ਮੋਹਾਲੀ : ਪੰਜਾਬ ਤੋਂ ਬਿਨਾਂ ਵੈਲਿਡ ਵੀਜ਼ਾ ਦੇ ਯੂਨਾਈਟਿਡ ਕਿੰਗਡਮ (UK) ਭੇਜਣ ਦੇ ਮਾਮਲੇ ਦੀ ਜਾਂਚ ਹੁਣ ਐਸਆਈਟੀ (SIT) ਕਰੇਗੀ। ਇਹ ਪਤਾ ਲਗਾਇਆ ਜਾਵੇਗਾ ਕਿ ਇਸ ਸੰਗਠਿਤ ਨੈੱਟਵਰਕ ਦਾ ਸੰਚਾਲਨ ਕਿਸ ਪੱਧਰ 'ਤੇ ਤੇ ਕਿਹੜੇ-ਕਿਹੜੇ ਲੋਕ ਕਰ ਰਹੇ ਹਨ। ਵਿਸ਼ੇਸ਼ ਜਾਂਚ ਟੀਮ (SIT) 'ਚ ਏਆਈਜੀ ਕ੍ਰਾਈਮ ਜ਼ੋਨ ਅੰਮ੍ਰਿਤਸਰ ਰਿਚਾ ਅਗਨੀਹੋਤਰੀ, ਸਟੇਟ ਕ੍ਰਾਈਮ ਮੋਹਾਲੀ ਦੀ ਇੰਸਪੈਕਟਰ ਗੀਤਾ ਤੇ ਅੰਮ੍ਰਿਤਸਰ ਸਟੇਟ ਕ੍ਰਾਈਮ ਦੇ ਇੰਸਪੈਕਟਰ ਜ਼ੋਰਾਵਰ ਸਿੰਘ ਸ਼ਾਮਲ ਹਨ।
ਇਸ ਮਾਮਲੇ 'ਚ ਸ਼ਾਮਲ ਟ੍ਰੈਵਲ ਏਜੰਸੀਆਂ ਦੀ ਪਛਾਣ ਪਹਿਲਾਂ ਹੀ ਹੋ ਚੁੱਕੀ ਹੈ ਜਿਸ ਤੋਂ ਬਾਅਦ ਹੁਣ ਪੂਰੇ ਨੈੱਟਵਰਕ ਦੀ ਡੂੰਘਾਈ ਨਾਲ ਪੜਤਾਲ ਸ਼ੁਰੂ ਕਰ ਦਿੱਤੀ ਗਈ ਹੈ। ਅਧਿਕਾਰੀਆਂ ਦਾ ਮੰਨਣਾ ਹੈ ਕਿ ਇਹ ਮਾਮਲਾ ਇੱਕ ਸੰਗਠਿਤ ਅਤੇ ਪਲਾਨਡ ਰੈਕੇਟ ਦਾ ਹਿੱਸਾ ਹੈ, ਜਿਸ ਦੀਆਂ ਜੜ੍ਹਾਂ ਪੰਜਾਬ ਤੋਂ ਬਾਹਰ ਦੇਸ਼ ਦੇ ਕਈ ਹਿੱਸਿਆਂ ਤੱਕ ਫੈਲੀਆਂ ਹੋ ਸਕਦੀਆਂ ਹਨ।
ਸਟੇਟ ਕ੍ਰਾਈਮ ਪੁਲਿਸ ਸਟੇਸ਼ਨ ਮੋਹਾਲੀ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਜਿਨ੍ਹਾਂ ਏਜੰਸੀਆਂ ਰਾਹੀਂ 14 ਲੋਕਾਂ ਨੂੰ ਯੂਕੇ ਭੇਜਿਆ ਗਿਆ, ਉਨ੍ਹਾਂ ਦੇ ਨਾਂ ਭਾਵੇਂ ਵੱਖ-ਵੱਖ ਹੋਣ ਅਤੇ ਉਨ੍ਹਾਂ ਦੇ ਦਫ਼ਤਰ ਵੱਖ-ਵੱਖ ਸ਼ਹਿਰਾਂ 'ਚ ਚੱਲ ਰਹੇ ਹੋਣ, ਪਰ ਉਹ ਸਾਰੇ ਆਪਸ 'ਚ ਜੁੜੇ ਹੋਏ (Interlinked) ਹਨ ਅਤੇ ਇੱਕੋ ਨੈੱਟਵਰਕ ਤਹਿਤ ਕੰਮ ਕਰ ਰਹੇ ਸਨ। ਇਹੀ ਕਾਰਨ ਹੈ ਕਿ ਇਸ ਪੂਰੇ ਮਾਮਲੇ ਨੂੰ ਇਕ ਵੱਡੇ ਸੰਗਠਿਤ ਰੈਕੇਟ ਵਜੋਂ ਦੇਖਿਆ ਜਾ ਰਿਹਾ ਹੈ।
ਇਨ੍ਹਾਂ ਏਜੰਸੀਆਂ ਨੂੰ ਪਹਿਲਾਂ ਹੀ ਪੂਰੀ ਪ੍ਰਕਿਰਿਆ ਦੀ ਜਾਣਕਾਰੀ ਹੁੰਦੀ ਸੀ ਅਤੇ ਉਸੇ ਦੇ ਅਧਾਰ 'ਤੇ ਯਾਤਰੀਆਂ ਨੂੰ ਤਿਆਰ ਕੀਤਾ ਜਾਂਦਾ ਸੀ। ਵਿਦੇਸ਼ ਪਹੁੰਚਦੇ ਹੀ ਸਬੰਧਤ ਲੋਕ ਸਿੱਧੇ ਏਅਰਪੋਰਟ 'ਤੇ ਸ਼ਰਨ (Asylum) ਲਈ ਅਰਜ਼ੀ ਦੇ ਦਿੰਦੇ ਸਨ, ਜਿਸ ਨਾਲ ਇਹ ਸੰਕੇਤ ਮਿਲਦਾ ਹੈ ਕਿ ਪੂਰਾ ਆਪਰੇਸ਼ਨ ਪਹਿਲਾਂ ਤੋਂ ਮਿੱਥਿਆ ਹੋਇਆ ਸੀ।
ਇਸ ਵਿੱਚ ਯਾਤਰੀਆਂ ਨੂੰ ਪਹਿਲਾਂ ਹੀ ਇਸ ਪ੍ਰਕਿਰਿਆ ਲਈ ਮਾਰਗਦਰਸ਼ਨ ਦਿੱਤਾ ਜਾਂਦਾ ਸੀ। ਹੁਣ SIT ਇਸ ਗੱਲ ਦੀ ਡੂੰਘੀ ਜਾਂਚ ਕਰੇਗੀ ਕਿ ਇਨ੍ਹਾਂ ਏਜੰਸੀਆਂ ਵਿਚਕਾਰ ਆਪਸੀ ਤਾਲਮੇਲ ਕਿਵੇਂ ਕੰਮ ਕਰ ਰਿਹਾ ਸੀ, ਨੈੱਟਵਰਕ ਦਾ ਮੁੱਖ ਸੰਚਾਲਨ ਕਿੱਥੋਂ ਹੋ ਰਿਹਾ ਸੀ ਅਤੇ ਇਸ ਵਿੱਚ ਕਿਨ੍ਹਾਂ-ਕਿਨ੍ਹਾਂ ਲੋਕਾਂ ਦੀ ਭੂਮਿਕਾ ਰਹੀ।
ਇਹ ਵੀ ਦੇਖਿਆ ਜਾਵੇਗਾ ਕਿ ਵਿਦੇਸ਼ ਭੇਜਣ ਦੀ ਪ੍ਰਕਿਰਿਆ ਵਿੱਚ ਕਿਹੜੇ ਦਸਤਾਵੇਜ਼ਾਂ ਦਾ ਇਸਤੇਮਾਲ ਕੀਤਾ ਗਿਆ ਅਤੇ ਕੀ ਇਸ ਵਿੱਚ ਕਿਸੇ ਕਿਸਮ ਦਾ ਫਰਜ਼ੀਵਾੜਾ ਜਾਂ ਨਿਯਮਾਂ ਦੀ ਅਣਦੇਖੀ ਕੀਤੀ ਗਈ। ਜਾਂਚ ਦਾ ਘੇਰਾ ਵਿੱਤੀ ਲੈਣ-ਦੇਣ ਤੱਕ ਵੀ ਵਧਾਇਆ ਗਿਆ ਹੈ। ਟੀਮ ਇਹ ਪਤਾ ਲਗਾਏਗੀ ਕਿ ਇਸ ਪੂਰੇ ਰੈਕੇਟ ਵਿੱਚ ਕਿੰਨੀ ਰਕਮ ਦਾ ਲੈਣ-ਦੇਣ ਹੋਇਆ ਅਤੇ ਕਿਹੜੇ ਮਾਧਿਅਮਾਂ ਰਾਹੀਂ ਪੈਸੇ ਦੀ ਟ੍ਰਾਂਜੈਕਸ਼ਨ ਕੀਤੀ ਗਈ।
ਨਾਲ ਹੀ ਏਅਰਪੋਰਟ ਪੱਧਰ 'ਤੇ ਸੰਭਾਵਿਤ ਚੂਕ ਜਾਂ ਕਿਸੇ ਕਿਸਮ ਦੀ ਮਿਲੀਭੁਗਤ ਨੂੰ ਵੀ ਨਜ਼ਰਅੰਦਾਜ਼ ਨਹੀਂ ਕੀਤਾ ਜਾਵੇਗਾ। ਡੀਐਸਪੀ ਰਾਜਿੰਦਰ ਸਿੰਘ ਦਾ ਕਹਿਣਾ ਹੈ ਕਿ SIT ਦੀ ਜਾਂਚ ਵਿੱਚ ਜੋ ਵੀ ਤੱਥ ਸਾਹਮਣੇ ਆਉਣਗੇ, ਉਨ੍ਹਾਂ ਦੇ ਅਧਾਰ 'ਤੇ ਸਖ਼ਤ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।