ਹੁਣ ਇਨਸਾਨ ਨਹੀਂ, ਰੋਬੋਟ ਕਰਨਗੇ ਕੈਬ ਦੀ ਸਵਾਰੀ! Uber ਦਾ ਵੱਡਾ ਧਮਾਕਾ, ਬਿਨਾਂ ਡਰਾਈਵਰ ਤੋਂ ਚੱਲਣਗੀਆਂ 50,000 ਟੈਕਸੀਆਂ

ਨਵੀਂ ਦਿੱਲੀ: ਕੀ ਤੁਸੀਂ ਕਲਪਨਾ ਕਰ ਸਕਦੇ ਹੋ ਕਿ ਤੁਸੀਂ ਕੈਬ ਬੁੱਕ ਕਰੋ ਤੇ ਡਰਾਈਵਰ ਦੀ ਜਗ੍ਹਾ ਇੱਕ ਰੋਬੋਟ ਕਾਰ ਲੈ ਕੇ ਆਵੇ? ਇਹ ਹਕੀਕਤ ਬਣਨ ਜਾ ਰਿਹਾ ਹੈ ਅਤੇ ਅਮਰੀਕਾ ਵਿੱਚ ਇਸ ਦੀ ਤਿਆਰੀ ਸ਼ੁਰੂ ਹੋ ਗਈ ਹੈ। ਦਰਅਸਲ, ਉਬੇਰ (Uber) ਨੇ ਆਪਣੇ ਮਨੁੱਖੀ ਡਰਾਈਵਰਾਂ ਦੇ ਬੇੜੇ ਨੂੰ ਰੋਬੋਟੈਕਸੀ (Robotaxi) ਵਿੱਚ ਬਦਲਣ ਲਈ ਅਮਰੀਕੀ ਇਲੈਕਟ੍ਰਿਕ-ਟਰੱਕ ਨਿਰਮਾਤਾ Rivian ਵਿੱਚ 1.25 ਬਿਲੀਅਨ ਡਾਲਰ ਤੱਕ ਦੇ ਨਿਵੇਸ਼ ਅਤੇ 50,000 ਆਟੋਨੋਮਸ (ਬਿਨਾਂ ਡਰਾਈਵਰ ਵਾਲੇ) ਵਾਹਨ ਖਰੀਦਣ ਦਾ ਸਮਝੌਤਾ ਕੀਤਾ ਹੈ।

ਰਾਈਡ-ਹੇਲਿੰਗ ਐਪ ਉਬੇਰ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਜੇਕਰ ਰੀਵੀਅਨ ਆਪਣੀ ਸੈਲਫ-ਡਰਾਈਵਿੰਗ ਤਕਨੀਕ ਵਿੱਚ ਮਹੱਤਵਪੂਰਨ ਸਫਲਤਾ ਹਾਸਲ ਕਰਦਾ ਹੈ, ਤਾਂ ਉਹ ਸ਼ੁਰੂਆਤੀ ਤੌਰ 'ਤੇ 300 ਮਿਲੀਅਨ ਡਾਲਰ ਦਾ ਨਿਵੇਸ਼ ਕਰੇਗਾ, ਜੋ 2031 ਤੱਕ ਵਧ ਕੇ 1.25 ਬਿਲੀਅਨ ਡਾਲਰ ਹੋ ਸਕਦਾ ਹੈ।

ਭਾਰਤ ਸਮੇਤ ਹੋਰ ਦੇਸ਼ਾਂ ਵਿੱਚ ਕਦੋਂ ਹੋਵੇਗੀ ਸ਼ੁਰੂਆਤ?

ਇਸ ਸਮਝੌਤੇ ਵਿੱਚ ਰੀਵੀਅਨ ਦੀ ਨਵੀਂ R2 SUV ਦੇ ਸ਼ੁਰੂਆਤੀ 10,000 ਰੋਬੋਟੈਕਸੀ ਵਰਜ਼ਨ ਸ਼ਾਮਲ ਹਨ। ਇਸ ਤੋਂ ਇਲਾਵਾ 2030 ਤੱਕ 40,000 ਹੋਰ ਵਾਹਨ ਖਰੀਦਣ ਦਾ ਆਪਸ਼ਨ ਵੀ ਰੱਖਿਆ ਗਿਆ ਹੈ। ਕੰਪਨੀਆਂ ਨੇ ਦੱਸਿਆ ਕਿ ਇਹ ਵਾਹਨ 2028 ਵਿੱਚ ਸੈਨ ਫ੍ਰਾਂਸਿਸਕੋ ਅਤੇ ਮਿਆਮੀ ਵਿੱਚ ਬਿਨਾਂ ਕਿਸੇ ਇਨਸਾਨੀ ਨਿਗਰਾਨੀ ਦੇ ਸੇਵਾ ਸ਼ੁਰੂ ਕਰਨਗੇ। 2031 ਦੇ ਅੰਤ ਤੱਕ ਇਹ ਸੇਵਾ ਅਮਰੀਕਾ, ਕੈਨੇਡਾ ਅਤੇ ਯੂਰਪ ਦੇ 25 ਸ਼ਹਿਰਾਂ ਵਿੱਚ ਫੈਲ ਜਾਵੇਗੀ।

ਭਾਰਤ ਵਿੱਚ ਕਦੋਂ?

ਭਾਰਤ ਵਿੱਚ ਅਜੇ ਬੁਨਿਆਦੀ ਢਾਂਚੇ ਅਤੇ ਟ੍ਰੈਫਿਕ ਨਿਯਮਾਂ ਕਾਰਨ ਇਸ ਸਰਵਿਸ ਦੇ ਆਉਣ ਵਿੱਚ ਸਮਾਂ ਲੱਗ ਸਕਦਾ ਹੈ, ਕਿਉਂਕਿ ਫਿਲਹਾਲ ਇਹ ਸੇਵਾ ਸਿਰਫ਼ ਵਿਕਸਿਤ ਦੇਸ਼ਾਂ ਲਈ ਤਿਆਰ ਕੀਤੀ ਜਾ ਰਹੀ ਹੈ।