PF ਦਾ ਪੈਸਾ ਕਢਵਾਉਣਾ ਹੋਇਆ ਆਸਾਨ, EPFO ਜਲਦ ਲਿਆ ਰਿਹਾ ਹੈ ATM ਤੇ UPI ਵਾਲਾ ਸਿਸਟਮ
ਕੀ ਤੁਸੀਂ ਘਰ ਖਰੀਦਣਾ ਚਾਹੁੰਦੇ ਹੋ ਜਾਂ ਅਚਾਨਕ ਆਈ ਕਿਸੇ ਮੈਡੀਕਲ ਐਮਰਜੈਂਸੀ ਕਾਰਨ ਤੁਹਾਨੂੰ ਪੈਸਿਆਂ ਦੀ ਸਖ਼ਤ ਲੋੜ ਹੈ? ਅਕਸਰ ਅਜਿਹੀ ਸਥਿਤੀ ਵਿੱਚ ਅਸੀਂ ਦੋਸਤਾਂ ਜਾਂ ਰਿਸ਼ਤੇਦਾਰਾਂ ਤੋਂ ਉਧਾਰ ਮੰਗਣ ਲੱਗਦੇ ਹਾਂ। ਪਰ ਹੁਣ ਤੁਹਾਨੂੰ ਪਰੇਸ਼ਾਨ ਹੋਣ ਦੀ ਲੋੜ ਨਹੀਂ ਹੈ। ਕਰਮਚਾਰੀ ਭਵਿੱਖ ਨਿਧੀ ਸੰਗਠਨ (EPFO) ਇੱਕ ਕ੍ਰਾਂਤੀਕਾਰੀ ਅਪਡੇਟ ਲੈ ਕੇ ਆਇਆ ਹੈ, ਜਿਸ ਨੂੰ EPFO 3.0 ਦਾ ਨਾਮ ਦਿੱਤਾ ਗਿਆ ਹੈ।
Posted By Anuradha Bains
Publish Date: Tue, 12 May 2026 12:58 PM (IST)
Updated Date: Tue, 12 May 2026 01:04 PM (IST)
ਨਵੀਂ ਦਿੱਲੀ। ਕੀ ਤੁਸੀਂ ਘਰ ਖਰੀਦਣਾ ਚਾਹੁੰਦੇ ਹੋ ਜਾਂ ਅਚਾਨਕ ਆਈ ਕਿਸੇ ਮੈਡੀਕਲ ਐਮਰਜੈਂਸੀ ਕਾਰਨ ਤੁਹਾਨੂੰ ਪੈਸਿਆਂ ਦੀ ਸਖ਼ਤ ਲੋੜ ਹੈ? ਅਕਸਰ ਅਜਿਹੀ ਸਥਿਤੀ ਵਿੱਚ ਅਸੀਂ ਦੋਸਤਾਂ ਜਾਂ ਰਿਸ਼ਤੇਦਾਰਾਂ ਤੋਂ ਉਧਾਰ ਮੰਗਣ ਲੱਗਦੇ ਹਾਂ। ਪਰ ਹੁਣ ਤੁਹਾਨੂੰ ਪਰੇਸ਼ਾਨ ਹੋਣ ਦੀ ਲੋੜ ਨਹੀਂ ਹੈ। ਕਰਮਚਾਰੀ ਭਵਿੱਖ ਨਿਧੀ ਸੰਗਠਨ (EPFO) ਇੱਕ ਕ੍ਰਾਂਤੀਕਾਰੀ ਅਪਡੇਟ ਲੈ ਕੇ ਆਇਆ ਹੈ, ਜਿਸ ਨੂੰ EPFO 3.0 ਦਾ ਨਾਮ ਦਿੱਤਾ ਗਿਆ ਹੈ। ਇਹ ਨਵਾਂ ਸਿਸਟਮ ਨਾ ਸਿਰਫ਼ ਪੀ.ਐਫ. ਕਢਵਾਉਣ (PF Withdrawal) ਦੀ ਪ੍ਰਕਿਰਿਆ ਨੂੰ ਆਸਾਨ ਬਣਾਏਗਾ, ਸਗੋਂ ਤੁਹਾਡੀ ਵਿੱਤੀ ਜ਼ਿੰਦਗੀ ਨੂੰ ਵੀ ਪੂਰੀ ਤਰ੍ਹਾਂ ਬਦਲ ਦੇਵੇਗਾ। ਆਓ ਜਾਣਦੇ ਹਾਂ ਕਿ EPFO 3.0 ਕੀ ਹੈ ਅਤੇ ਤੁਸੀਂ ਇਸ ਦਾ ਲਾਭ ਕਿਵੇਂ ਲੈ ਸਕਦੇ ਹੋ।
EPFO 3.0: ਪੁਰਾਣੇ ਸਿਸਟਮ ਨਾਲੋਂ ਕਿੰਨਾ ਵੱਖਰਾ?
EPFO ਤੁਹਾਡੀ ਤਨਖਾਹ ਵਿੱਚੋਂ ਕੱਟੇ ਜਾਣ ਵਾਲੇ ਪ੍ਰੋਵੀਡੈਂਟ ਫੰਡ (PF) ਦਾ ਪ੍ਰਬੰਧਨ ਕਰਦਾ ਹੈ ਤਾਂ ਜੋ ਤੁਹਾਡੇ ਰਿਟਾਇਰਮੈਂਟ ਤੋਂ ਬਾਅਦ ਇੱਕ ਮੋਟਾ ਫੰਡ ਤਿਆਰ ਹੋ ਸਕੇ। EPFO 3.0 ਇਸੇ ਸਿਸਟਮ ਦਾ ਨਵਾਂ ਅਤੇ ਹਾਈ-ਟੈਕ ਵਰਜ਼ਨ ਹੈ, ਜੋ ਦੇਸ਼ ਦੇ 7.8 ਕਰੋੜ ਮੈਂਬਰਾਂ ਲਈ ਗੇਮ-ਚੇਂਜਰ ਸਾਬਤ ਹੋਵੇਗਾ।
ਕੀ-ਕੀ ਬਦਲਿਆ:
ਫਾਸਟ ਕਲੇਮ ਸੈਟਲਮੈਂਟ: ਪਹਿਲਾਂ ਆਟੋ ਸੈਟਲਮੈਂਟ ਦੀ ਸੀਮਾ 1 ਲੱਖ ਰੁਪਏ ਸੀ, ਜਿਸ ਨੂੰ ਹੁਣ ਵਧਾ ਕੇ 5 ਲੱਖ ਰੁਪਏ ਕਰ ਦਿੱਤਾ ਗਿਆ ਹੈ।
ਸਮੇਂ ਦੀ ਬਚਤ: ਜਿੱਥੇ ਪਹਿਲਾਂ ਪੈਸੇ ਆਉਣ ਵਿੱਚ 10 ਤੋਂ 20 ਦਿਨ ਲੱਗਦੇ ਸਨ, ਹੁਣ ਸਿਰਫ਼ 2 ਤੋਂ 5 ਦਿਨਾਂ ਵਿੱਚ ਪੈਸਾ ਤੁਹਾਡੇ ਖਾਤੇ ਵਿੱਚ ਆ ਜਾਵੇਗਾ।
ਪੂਰੀ ਤਰ੍ਹਾਂ ਪੇਪਰਲੈੱਸ: ਆਧਾਰ-ਵੈਰੀਫਾਈਡ ਖਾਤਿਆਂ ਲਈ ਹੁਣ ਚੈੱਕ ਦੀ ਫੋਟੋ ਜਾਂ ਪਾਸਬੁੱਕ ਅਪਲੋਡ ਕਰਨ ਦੀ ਲੋੜ ਨਹੀਂ ਹੋਵੇਗੀ।
ਕੰਪਨੀ ਦੀ ਮਨਜ਼ੂਰੀ ਦੀ ਲੋੜ ਨਹੀਂ: ਹੁਣ KYC ਅਪਡੇਟ ਕਰਨ ਜਾਂ ਕਲੇਮ ਕਰਨ ਲਈ ਤੁਹਾਨੂੰ ਆਪਣੀ ਕੰਪਨੀ ਦੀ ਮਨਜ਼ੂਰੀ ਦੀ ਉਡੀਕ ਨਹੀਂ ਕਰਨੀ ਪਵੇਗੀ।
ਹੁਣ 13 ਨਹੀਂ, ਸਿਰਫ਼ 3 ਕੈਟੇਗਰੀਆਂ ਵਿੱਚ ਮਿਲੇਗਾ ਪੈਸਾ: EPFO ਨੇ ਗੁੰਝਲਾਂ ਨੂੰ ਖ਼ਤਮ ਕਰਦੇ ਹੋਏ ਨਿਕਾਸੀ ਦੀਆਂ 13 ਪੁਰਾਣੀਆਂ ਸ਼੍ਰੇਣੀਆਂ ਨੂੰ ਹਟਾ ਕੇ ਉਨ੍ਹਾਂ ਨੂੰ 3 ਆਸਾਨ ਗਰੁੱਪਾਂ ਵਿੱਚ ਵੰਡ ਦਿੱਤਾ ਹੈ:
ਜ਼ਰੂਰੀ (Urgent): ਬਿਮਾਰੀ, ਵਿਆਹ ਅਤੇ ਪੜ੍ਹਾਈ ਲਈ।
ਰਿਹਾਇਸ਼ (Housing): ਘਰ ਖਰੀਦਣ ਜਾਂ ਹੋਮ ਲੋਨ ਚੁਕਾਉਣ ਲਈ।
ਵਿਸ਼ੇਸ਼ ਪ੍ਰਸਥਿਤੀਆਂ: ਬੇਰੁਜ਼ਗਾਰੀ ਜਾਂ ਰਿਟਾਇਰਮੈਂਟ ਦੀ ਸਥਿਤੀ ਵਿੱਚ।
ATM ਅਤੇ UPI ਰਾਹੀਂ ਪੀ.ਐਫ. ਨਿਕਾਸੀ
EPFO 3.0 ਦਾ ਸਭ ਤੋਂ ਵੱਡਾ ਆਕਰਸ਼ਣ ATM ਅਤੇ UPI ਰਾਹੀਂ ਨਿਕਾਸੀ ਹੈ। ਹੁਣ ਤੱਕ ਤੁਹਾਨੂੰ ਆਨਲਾਈਨ ਫਾਰਮ ਭਰ ਕੇ ਲੰਬੀ ਉਡੀਕ ਕਰਨੀ ਪੈਂਦੀ ਸੀ, ਪਰ ਹੁਣ EPFO Withdrawal Card ਰਾਹੀਂ ਤੁਸੀਂ ਆਪਣਾ ਪੈਸਾ ਆਸਾਨੀ ਨਾਲ ਕੱਢ ਸਕੋਗੇ। ਇਹ ਕਾਰਡ ਬਿਲਕੁਲ ਡੈਬਿਟ ਕਾਰਡ ਵਾਂਗ ਕੰਮ ਕਰੇਗਾ ਅਤੇ ਤੁਹਾਡਾ ਪੈਸਾ ਸਿੱਧਾ ATM ਮਸ਼ੀਨ ਤੋਂ ਨਿਕਲ ਜਾਵੇਗਾ। ਦੂਜਾ ਤਰੀਕਾ UPI ਰਾਹੀਂ ਹੈ। ਤੁਸੀਂ ਆਪਣੇ ਪੀ.ਐਫ. ਖਾਤੇ ਨੂੰ ਗੂਗਲ ਪੇ (Google Pay) ਜਾਂ ਫੋਨ ਪੇ (PhonePe) ਨਾਲ ਕਨੈਕਟ ਕਰ ਸਕਦੇ ਹੋ ਅਤੇ ਫਿਰ 1 ਲੱਖ ਰੁਪਏ ਤੱਕ ਦਾ ਲੈਣ-ਦੇਣ ਆਪਣੇ ਪੀ.ਐਫ. ਖਾਤੇ ਤੋਂ ਕਰ ਸਕਦੇ ਹੋ।
ਪੀ.ਐਫ. ਦਾ ਪੈਸਾ ਕਢਵਾਉਣ ਦੀਆਂ ਸ਼ਰਤਾਂ ਕੀ ਹਨ?
ਇਸ ਸਹੂਲਤ ਦਾ ਲਾਭ ਲੈਣ ਲਈ ਤੁਹਾਡਾ UAN (Universal Account Number) ਐਕਟਿਵ ਹੋਣਾ ਚਾਹੀਦਾ ਹੈ। ਨਾਲ ਹੀ, ਇਸ ਦਾ ਆਧਾਰ, ਪੈਨ (PAN) ਅਤੇ ਬੈਂਕ ਖਾਤੇ ਦੇ ਵੇਰਵਿਆਂ ਨਾਲ ਪੂਰੀ ਤਰ੍ਹਾਂ ਲਿੰਕ ਹੋਣਾ ਲਾਜ਼ਮੀ ਹੈ।
ਕਿਸ ਕੰਮ ਲਈ ਕਿੰਨਾ ਪੈਸਾ ਕਢਵਾ ਸਕਦੇ ਹੋ?
ਘਰ ਖਰੀਦਣਾ ਜਾਂ ਬਣਾਉਣਾ: ਇਸ ਕੰਮ ਲਈ ਕਰਮਚਾਰੀ ਦੀ ਲਗਾਤਾਰ 5 ਸਾਲ ਦੀ ਸਰਵਿਸ ਹੋਣੀ ਚਾਹੀਦੀ ਹੈ। ਘਰ ਖਰੀਦਣ ਲਈ ਮਹੀਨਾਵਾਰ ਤਨਖਾਹ ਦਾ 24 ਗੁਣਾ ਅਤੇ ਘਰ ਬਣਾਉਣ ਲਈ ਮਹੀਨਾਵਾਰ ਤਨਖਾਹ ਦਾ 36 ਗੁਣਾ ਪੈਸਾ ਕਢਵਾਇਆ ਜਾ ਸਕਦਾ ਹੈ।
ਮੈਡੀਕਲ ਇਲਾਜ: ਇਸ ਲਈ ਕੋਈ ਖਾਸ ਸ਼ਰਤ ਨਹੀਂ ਹੈ। ਬਿਮਾਰੀ ਦੀ ਹਾਲਤ ਵਿੱਚ ਵਿਆਜ ਸਮੇਤ ਕਰਮਚਾਰੀ ਦੇ ਯੋਗਦਾਨ ਦੇ ਬਰਾਬਰ ਰਕਮ ਜਾਂ ਮਹੀਨਾਵਾਰ ਤਨਖਾਹ ਦਾ 6 ਗੁਣਾ (ਜਿਹੜਾ ਵੀ ਘੱਟ ਹੋਵੇ) ਕਢਵਾ ਸਕਦੇ ਹੋ।
ਨੌਕਰੀ ਜਾਣ 'ਤੇ: ਜੇਕਰ ਨੌਕਰੀ ਛੁੱਟ ਜਾਂਦੀ ਹੈ, ਤਾਂ 1 ਮਹੀਨੇ ਬਾਅਦ 75% ਅਤੇ 2 ਮਹੀਨੇ ਬਾਅਦ ਬਾਕੀ ਬਚਿਆ 25% ਪੈਸਾ ਕਢਵਾਇਆ ਜਾ ਸਕਦਾ ਹੈ।
ਵਿਆਹ ਲਈ: ਕਰਮਚਾਰੀ ਦੀ ਲਗਾਤਾਰ 7 ਸਾਲ ਦੀ ਸਰਵਿਸ ਹੋਣੀ ਚਾਹੀਦੀ ਹੈ। ਵਿਆਜ ਸਮੇਤ ਕਰਮਚਾਰੀ ਦੇ ਯੋਗਦਾਨ ਦਾ 50% ਤੱਕ ਕਢਵਾਇਆ ਜਾ ਸਕਦਾ ਹੈ।
ਟੈਕਸ ਲਾਭ ਅਤੇ ਮਾਹਿਰਾਂ ਦੀ ਸਲਾਹ
ਜੇਕਰ ਤੁਸੀਂ ਕੁੱਲ 5 ਸਾਲ ਦੀ ਨੌਕਰੀ ਕੰਪਨੀ ਵਿੱਚ ਜਾਂ ਵੱਖ-ਵੱਖ ਕੰਪਨੀਆਂ ਨੂੰ ਮਿਲਾ ਕੇ) ਪੂਰੀ ਕਰ ਲਈ ਹੈ, ਤਾਂ ਪੀ.ਐਫ. ਨਿਕਾਸੀ 'ਤੇ ਕੋਈ ਇਨਕਮ ਟੈਕਸ ਨਹੀਂ ਦੇਣਾ ਹੋਵੇਗਾ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਸ ਅਪਡੇਟ ਨਾਲ ਸਹੂਲਤ ਜ਼ਰੂਰ ਮਿਲੀ ਹੈ, ਪਰ ਇਸ ਦਾ ਮਤਲਬ ਇਹ ਨਹੀਂ ਕਿ ਹਰ ਛੋਟੀ ਲੋੜ 'ਤੇ ਪੈਸਾ ਕਢਵਾ ਲਿਆ ਜਾਵੇ।
ਪੀ.ਐਫ. 'ਤੇ ਮਿਲਣ ਵਾਲਾ ਕੰਪਾਊਂਡਿੰਗ ਇੰਟਰੈਸਟ (ਚੱਕਰਵਰਤੀ ਵਿਆਜ) ਤੁਹਾਨੂੰ ਲੰਬੇ ਸਮੇਂ ਵਿੱਚ ਕਰੋੜਪਤੀ ਬਣਾ ਸਕਦਾ ਹੈ। ਇਹ ਤੁਹਾਡੇ ਬੁਢਾਪੇ ਦਾ ਸਭ ਤੋਂ ਵੱਡਾ ਸਹਾਰਾ ਹੈ, ਇਸ ਲਈ ਇਸ ਨੂੰ ਸਿਰਫ਼ ਉਦੋਂ ਹੀ ਹੱਥ ਲਗਾਓ ਜਦੋਂ ਕੋਈ ਹੋਰ ਰਸਤਾ ਨਾ ਬਚਿਆ ਹੋਵੇ।