ਭਾਰਤੀ ਮੂਲ ਦੀ ਔਰਤ ਨੂੰ ICE ਨੇ ਕੀਤਾ ਡਿਟੇਨ, 27 ਸਾਲਾਂ ਤੋਂ ਅਮਰੀਕਾ 'ਚ ਰਹਿ ਰਹੀ ਸੀ ਗ੍ਰੀਨ ਕਾਰਡ ਹੋਲਡਰ ਬਜ਼ੁਰਗ

ਡਿਜੀਟਲ ਡੈਸਕ, ਵਾਸ਼ਿੰਗਟਨ : ਅਮਰੀਕਾ 'ਚ ਭਾਰਤੀ ਮੂਲ ਦੀ ਇਕ ਬਜ਼ੁਰਗ ਔਰਤ ਨੂੰ ਹਿਰਾਸਤ 'ਚ ਲੈ ਲਿਆ ਗਿਆ ਹੈ। ਔਰਤ ਗ੍ਰੀਨ ਕਾਰਡ ਹੋਲਡਰ ਹੈ ਤੇ ਪਿਛਲੇ 27 ਸਾਲਾਂ ਤੋਂ ਅਮਰੀਕਾ 'ਚ ਰਹਿ ਰਹੀ ਹੈ। US ਇਮੀਗ੍ਰੇਸ਼ਨ ਐਂਡ ਕਸਟਮਜ਼ ਐਨਫੋਰਸਮੈਂਟ (ICE) ਨੇ ਇਹ ਕਾਰਵਾਈ ਕੀਤੀ।

ਵੈਂਕਟਾ ਨਰਸਾਮੰਬਾ ਵਾਸਮਸੈੱਟੀ 2013 ਤੋਂ ਅਮਰੀਕਾ 'ਚ LPR (ਕਾਨੂੰਨੀ ਤੌਰ 'ਤੇ ਸਥਾਈ ਨਿਵਾਸੀ) ਹੈ। ਨਿਊਜ਼ਵੀਕ ਦੀ ਰਿਪੋਰਟ ਮੁਤਾਬਕ, ਔਰਤ ਨੂੰ ਜਾਰਜੀਆ ਸਥਿਤ ਇਕ ਡਿਟੈਂਸ਼ਨ ਸੈਂਟਰ 'ਚ ਰੱਖਿਆ ਗਿਆ ਹੈ। ਵਾਸਮਸੈੱਟੀ ਦੀ ਧੀ ਯਸ਼ਸਵੀ ਖ਼ੁਦ ਟੈਕਸਾਸ ਤੇ ਨਿਊ ਜਰਸੀ 'ਚ ਲਾਇਸੈਂਸ ਪ੍ਰਾਪਤ ਐਂਪਲਾਇਮੈਂਟ-ਬੇਸਡ ਇਮੀਗ੍ਰੇਸ਼ਨ ਅਟਾਰਨੀ ਹੈ।

2022 'ਚ ਆਈ ਸੀ ਭਾਰਤ

ਦਰਅਸਲ ਵਾਸਮਸੈੱਟੀ 2022 'ਚ ਭਾਰਤ ਆਈ ਸੀ ਤੇ ਇੱਥੇ ਉਸਨੇ ਲਗਪਗ 7 ਮਹੀਨਿਆਂ ਦਾ ਸਮਾਂ ਬਿਤਾਇਆ ਸੀ। ਵਾਸਮਸੈੱਟੀ ਦੇ ਵਕੀਲ ਦਾ ਕਹਿਣਾ ਹੈ ਕਿ ਇਸ ਦੌਰਾਨ ਉਸਨੇ ਆਪਣੇ ਬੁੱਢੇ ਮਾਂ-ਬਾਪ ਦੀ ਦੇਖਭਾਲ ਕੀਤੀ ਅਤੇ ਫਿਰ ਉਹ ਖ਼ੁਦ ਕੋਵਿਡ-19 ਤੋਂ ਪੀੜਤ ਹੋ ਗਈ ਸੀ। ਹਸਪਤਾਲ ਤੋਂ ਛੁੱਟੀ ਮਿਲਣ ਤੋਂ ਬਾਅਦ ਉਹ ਲੰਬੀ ਅੰਤਰਰਾਸ਼ਟਰੀ ਯਾਤਰਾ ਕਰਨ ਦੇ ਯੋਗ ਨਹੀਂ ਸੀ ਅਤੇ ਜਦੋਂ ਉਹ ਠੀਕ ਹੋਈ ਤਾਂ ਫਰਵਰੀ 2023 'ਚ ਅਮਰੀਕਾ ਵਾਪਸ ਪਰਤੀ।

ਅਮਰੀਕੀ ਨਿਯਮਾਂ ਮੁਤਾਬਕ, LPR ਨੂੰ ਜ਼ਿਆਦਾ ਤੋਂ ਜ਼ਿਆਦਾ 6 ਮਹੀਨਿਆਂ ਤੱਕ ਹੀ ਅਮਰੀਕਾ ਤੋਂ ਬਾਹਰ ਰਹਿਣ ਦੀ ਇਜਾਜ਼ਤ ਹੁੰਦੀ ਹੈ। ਜੇਕਰ ਕੋਈ ਇਸ ਤੋਂ ਜ਼ਿਆਦਾ ਸਮਾਂ ਦੇਸ਼ ਤੋਂ ਬਾਹਰ ਬਿਤਾਉਂਦਾ ਹੈ, ਤਾਂ ਉਸਨੂੰ ਸੰਘੀ (Federal) ਇਮੀਗ੍ਰੇਸ਼ਨ ਕਾਨੂੰਨ ਦੇ ਤਹਿਤ ਦੇਸ਼ ਵਿੱਚੋਂ ਕੱਢੇ ਜਾਣ ਦੀ ਕਾਰਵਾਈ ਦਾ ਸਾਹਮਣਾ ਕਰਨਾ ਪੈਂਦਾ ਹੈ।

6 ਮਹੀਨਿਆਂ ਤੋਂ ਜ਼ਿਆਦਾ ਬਾਹਰ ਰਹਿਣ 'ਤੇ ਕਾਨੂੰਨ ਸਖ਼ਤ

ਅਜਿਹੇ ਵਿਅਕਤੀ ਤੋਂ ਸੰਘੀ ਅਧਿਕਾਰੀ ਇਹ ਜਾਣ ਸਕਦੇ ਹਨ ਕਿ ਕੀ ਉਸਦਾ ਇਰਾਦਾ ਅਮਰੀਕਾ 'ਚ ਆਪਣਾ ਪਰਮਾਨੈਂਟ ਨਿਵਾਸ ਛੱਡਣ ਦਾ ਸੀ। ਵਾਸਮਸੈੱਟੀ ਦੀ ਧੀ ਯਸ਼ਸਵੀ ਦੀ ਦੋਸਤ ਅਤੇ ਇਮੀਗ੍ਰੇਸ਼ਨ ਅਟਾਰਨੀ ਜੋਅ ਵਿਲਸਨ ਨੇ ਦੱਸਿਆ ਕਿ ਵਾਸਮਸੈੱਟੀ ਨਾਰਥ ਕੈਰੋਲੀਨਾ 'ਚ ਸਪੈਸ਼ਲ ਚਾਈਲਡ ਵਿਦਿਆਰਥੀਆਂ ਲਈ ਟੀਚਰ ਦੇ ਤੌਰ 'ਤੇ ਕੰਮ ਕਰ ਚੁੱਕੀ ਹੈ।

ਵਿਲਸਨ ਨੇ ਕਿਹਾ ਕਿ ਉਹ ਦੋ ਅਮਰੀਕੀ ਨਾਗਰਿਕ ਬੱਚਿਆਂ ਦੀ ਮਾਂ ਹੈ, ਉਸਦੇ ਦੋ ਪੋਤੇ-ਪੋਤੀਆਂ/ਦੋਹਤੇ-ਦੋਹਤੀਆਂ ਵੀ ਅਮਰੀਕੀ ਨਾਗਰਿਕ ਹਨ। ਉਸਦਾ ਘਰ, ਪਰਿਵਾਰ, ਕਰੀਅਰ ਅਤੇ ਜ਼ਿੰਦਗੀ ਸਭ ਇੱਥੇ ਹੀ ਹੈ। ਇਹ ਸਭ ਕੁਝ ਤਦ ਹੋ ਰਿਹਾ ਹੈ, ਜਦੋਂ ਮਈ ਵਿੱਚ ਇੱਕ ਅਮਰੀਕੀ ਜੱਜ ਨੇ ਉਸਨੂੰ ਦੇਸ਼ ਵਿੱਚੋਂ ਕੱਢਣ ਦੇ ਇੱਕ ਪੁਰਾਣੇ ਮਾਮਲੇ ਨੂੰ ਖ਼ਤਮ ਕਰ ਦਿੱਤਾ ਸੀ।