ਮਾਪਿਆਂ ਲਈ ਅਲਰਟ! ਬਚਪਨ ’ਚ ਲੋੜ ਤੋਂ ਵੱਧ ਖਾਧਾ ਜੰਕ ਫੂਡ ਬਦਲ ਸਕਦਾ ਹੈ ਦਿਮਾਗੀ ਬਣਤਰ: ਨਵੀਂ ਖੋਜ 'ਚ ਖ਼ੁਲਾਸਾ

ਏਐੱਨਆਈ: ਬਚਪਨ ਵਿਚ ਜ਼ਿਆਦਾ ਮਾਤਰਾ ਵਿਚ ਜੰਕ ਫੂਡ ਖਾਣ ਨਾਲ ਦਿਮਾਗ ਵਿਚ ਸਥਾਈ ਬਦਲਾਅ ਲਿਆ ਸਕਦਾ ਹੈ, ਭਾਵੇਂ ਕਿ ਵਿਅਕਤੀ ਬਾਅਦ ਵਿਚ ਸਿਹਤਮੰਦ ਖੁਰਾਕ ਅਪਣਾ ਲਵੇ। ਵਿਗਿਆਨੀਆਂ ਨੇ ਪਾਇਆ ਹੈ ਕਿ ਚਰਬੀ ਅਤੇ ਖੰਡ ਨਾਲ ਭਰਪੂਰ ਖੁਰਾਕ ਖਾਣ ਦੀਆਂ ਆਦਤਾਂ ਨੂੰ ਬਦਲ ਦਿੰਦੀ ਹੈ ਅਤੇ ਭੁੱਖ ਨੂੰ ਕੰਟਰੋਲ ਕਰਨ ਵਾਲੇ ਦਿਮਾਗ ਦੇ ਖੇਤਰਾਂ 'ਤੇ ਪ੍ਰਭਾਵ ਪਾਉਂਦੀ ਹੈ। ਹਾਲਾਂਕਿ, ਕੁਝ ਲਾਭਦਾਇਕ ਅੰਤੜੀਆ ਦੇ ਬੈਕਟੀਰੀਆ ਅਤੇ ਪ੍ਰੀਬਾਇਓਟਿਕ ਫਾਈਬਰ ਇਨ੍ਹਾਂ ਪ੍ਰਭਾਵਾਂ ਨੂੰ ਕੁਝ ਹੱਦ ਤੱਕ ਘਟਾਉਣ ਵਿਚ ਸਮਰੱਥ ਪਾਏ ਗਏ ਹਨ।

ਯੂਨੀਵਰਸਿਟੀ ਕਾਲਜ ਕਾਰਕ ਦੇ ਇਕ ਅਧਿਐਨ ਦੇ ਅਨੁਸਾਰ, ਜੋ ਬੱਚੇ ਲਗਾਤਾਰ ਉੱਚ ਚਰਬੀ ਅਤੇ ਵੱਧ ਖੰਡ ਵਾਲੇ ਖੁਰਾਕ ਪਦਾਰਥ ਖਾਂਦੇ ਹਨ, ਉਨ੍ਹਾਂ ਦੇ ਦਿਮਾਗ ਵਿਚ ਸਥਾਈ ਬਦਲਾਅ ਹੋ ਸਕਦੇ ਹਨ ਜੋ ਖੁਰਾਕ ਵਿਚ ਸੁਧਾਰ ਦੇ ਬਾਵਜੂਦ ਲੰਬੇ ਸਮੇਂ ਤੱਕ ਬਣੇ ਰਹਿੰਦੇ ਹਨ। ਨੇਚਰ ਕਮਿਊਨੀਕੇਸ਼ਨਜ਼ ਵਿਚ ਪ੍ਰਕਾਸ਼ਿਤ ਇਸ ਅਧਿਐਨ ਵਿਚ ਪਾਇਆ ਗਿਆ ਕਿ ਪੌਸ਼ਕ ਤੱਤਾਂ ਤੋਂ ਰਹਿਤ ਖੁਰਾਕ ਪਦਾਰਥਾਂ ਦੇ ਸ਼ੁਰੂਆਤੀ ਸੇਵਨ ਨਾਲ ਖਾਣ-ਪੀਣ ਦੀਆਂ ਆਦਤਾਂ 'ਤੇ ਸਥਾਈ ਪ੍ਰਭਾਵ ਪੈ ਸਕਦੇ ਹਨ।

ਸ਼ੋਧਕਰਤਾ ਨੇ ਇਕ ਪ੍ਰੀਕਲਿਨਿਕਲ ਮਾਊਸ ਮਾਡਲ ਦੀ ਵਰਤੋਂ ਕੀਤੀ ਅਤੇ ਪਾਇਆ ਕਿ ਜਿਨ੍ਹਾਂ ਜਾਨਵਰਾਂ ਨੂੰ ਜੀਵਨ ਦੇ ਸ਼ੁਰੂਆਤੀ ਦੌਰ ਵਿਚ ਉੱਚ ਚਰਬੀ ਅਤੇ ਉੱਚ ਖੰਡ ਵਾਲੀ ਖੁਰਾਕ ਦਿੱਤੀ ਗਈ, ਉਨ੍ਹਾਂ ਦੇ ਵੱਡੇ ਹੋਣ 'ਤੇ ਖਾਣ-ਪੀਣ ਦੀਆਂ ਆਦਤਾਂ ਵਿਚ ਸਥਾਈ ਬਦਲਾਅ ਦਿਖਾਈ ਦਿੱਤੇ। ਟੀਮ ਨੇ ਇਨ੍ਹਾਂ ਵਿਹਾਰਕ ਪ੍ਰਭਾਵਾਂ ਨੂੰ ਹਾਈਪੋਥੈਲਮਸ ਵਿਚ ਗੜਬੜੀ ਨਾਲ ਜੋੜਿਆ, ਜੋ ਦਿਮਾਗ ਦਾ ਉਹ ਖੇਤਰ ਹੈ ਜੋ ਭੁੱਖ ਅਤੇ ਊਰਜਾ ਸੰਤੁਲਨ ਨੂੰ ਕੰਟਰੋਲ ਕਰਨ ਲਈ ਜ਼ਿੰਮੇਵਾਰ ਹੈ। ਅਧਿਐਨ ਦੀ ਲੇਖਿਕਾ ਡਾ. ਕ੍ਰਿਸਟੀਨਾ ਕੁਏਸਟਾ-ਮਾਰਟੀ ਨੇ ਕਿਹਾ ਕਿ ਸਾਡੇ ਨਤੀਜੇ ਦੱਸਦੇ ਹਨ ਕਿ ਜੀਵਨ ਦੇ ਸ਼ੁਰੂਆਤੀ ਦੌਰ ਵਿਚ ਅਸੀਂ ਜੋ ਖਾਂਦੇ ਹਾਂ, ਉਹ ਅਸਲ ਵਿਚ ਮਹੱਤਵ ਰੱਖਦਾ ਹੈ।