ਸ਼ੁਭਮਨ ਗਿੱਲ ਨੂੰ ਆਊਟ ਕਰਨਾ ਮੇਰੇ ਕਰੀਅਰ ਦੀ ਸਭ ਤੋਂ ਵੱਡੀ ਵਿਕਟ : ਕਾਰਤਿਕ ਚੱਢਾ

ਰਣਜੀਤ ਸਿੰਘ ਰਾਣਾ, ਪੰਜਾਬੀ ਜਾਗਰਣ, ਮੁਹਾਲੀ : ਮੁਹਾਲੀ ਦੇ ਆਈਐੱਸ ਬਿੰਦਰਾ ਸਟੇਡੀਅਮ ਵਿਖੇ ਐਤਵਾਰ ਨੂੰ ਖੇਡੇ ਗਏ ਸ਼ੇਰ-ਏ-ਪੰਜਾਬ ਟੀ-20 ਲੀਗ ਮੁਕਾਬਲੇ ’ਚ ਲੁਧਿਆਣਾ ਲਾਇਨਜ਼ ਦੇ ਗੇਂਦਬਾਜ਼ ਕਾਰਤਿਕ ਚੱਢਾ ਨੇ ਫਾਜ਼ਿਲਕਾ ਫਾਲਕਨਜ਼ ਵਿਰੁੱਧ ਸ਼ਾਨਦਾਰ ਗੇਂਦਬਾਜ਼ੀ ਦਾ ਪ੍ਰਦਰਸ਼ਨ ਕੀਤਾ। ਕਾਰਤਿਕ ਨੇ ਆਪਣੇ ਚਾਰ ਓਵਰਾਂ ’ਚ 9 ਦੌੜਾਂ ਦੇ ਕੇ 4 ਵਿਕਟਾਂ ਲੈਣ ਦਾ ਪ੍ਰਭਾਵਸ਼ਾਲੀ ਪ੍ਰਦਰਸ਼ਨ ਕੀਤਾ, ਜਿਸ ’ਚ ਭਾਰਤੀ ਕਪਤਾਨ ਸ਼ੁਭਮਨ ਗਿੱਲ ਦੀ ਅਹਿਮ ਵਿਕਟ ਵੀ ਸ਼ਾਮਲ ਸੀ, ਗਿੱਲ ਨੇ 21 ਗੇਂਦਾਂ ’ਤੇ 40 ਦੌੜਾਂ ਬਣਾਈਆਂ ਸਨ। ਇਸ ਵੱਡੀ ਵਿਕਟ ਬਾਰੇ ਗੱਲ ਕਰਦਿਆਂ ਕਾਰਤਿਕ ਨੇ ਕਿਹਾ ਕਿ ਸ਼ੁਭਮਨ ਗਿੱਲ ਦੀ ਵਿਕਟ ਲੈਣਾ ਮੇਰੇ ਕਰੀਅਰ ਦੀ ਸਭ ਤੋਂ ਵੱਡੀ ਵਿਕਟ ਸੀ, ਖ਼ਾਸ ਕਰਕੇ ਅਜਿਹੇ ਮੰਚ ’ਤੇ। ਮੈਂ ਇਸ ਚੁਣੌਤੀ ਲਈ ਮਾਨਸਿਕ ਤੌਰ ’ਤੇ ਤਿਆਰ ਸੀ ਤੇ ਸਿਰਫ਼ ਆਪਣੀ ਕਾਬਲੀਅਤ ’ਤੇ ਭਰੋਸਾ ਰੱਖਣਾ ਚਾਹੁੰਦਾ ਸੀ। ਜਦੋਂ ਮੈਨੂੰ ਉਹ ਵਿਕਟ ਮਿਲੀ ਤੇ ਫਿਰ ਮੈਂ ਥੋੜ੍ਹੇ ਜਿਹੇ ਵਕਫ਼ੇ ’ਚ ਦੋ ਹੋਰ ਵਿਕਟਾਂ ਲਈਆਂ, ਤਾਂ ਇਹ ਸਭ ਕੁਝ ਆਪਣੇ ਆਪ ’ਤੇ ਭਰੋਸਾ ਰੱਖਣ ਬਾਰੇ ਸੀ। ਅੱਗੇ ਵਧਦੇ ਹੋਏ, ਮੈਂ ਕੁਝ ਵੀ ਵਾਧੂ (ਜਾਂ ਵੱਖਰਾ) ਨਹੀਂ ਕਰਨਾ ਚਾਹੁੰਦਾ। ਮੈਂ ਬਸ ਆਪਣੀ ਗੇਂਦਬਾਜ਼ੀ ’ਤੇ ਭਰੋਸਾ ਰੱਖਾਂਗਾ, ਆਪਣੀ ਆਮ ਪ੍ਰਕਿਰਿਆ ਦੀ ਪਾਲਣਾ ਕਰਾਂਗਾ ਤੇ ਉਸੇ ਚੀਜ਼ ’ਤੇ ਧਿਆਨ ਦੇਵਾਂਗਾ ਜੋ ਮੈਂ ਹੁਣ ਤੱਕ ਕਰਦਾ ਆਇਆ ਹਾਂ।

ਕਾਰਤਿਕ ਨੇ ਗੰਭੀਰਤਾ ਨਾਲ ਗੇਂਦਬਾਜ਼ੀ ਸ਼ੁਰੂ ਕਰਨ ਤੋਂ ਪਹਿਲਾਂ ਇੱਕ ਬੱਲੇਬਾਜ਼ ਵਜੋਂ ਆਪਣਾ ਕ੍ਰਿਕਟ ਸਫ਼ਰ ਸ਼ੁਰੂ ਕੀਤਾ ਸੀ। ਉਸਨੇ ਇਹ ਵੀ ਦੱਸਿਆ ਕਿ ਉਹ ਸ਼ੁਭਮਨ ਗਿੱਲ ਤੇ ਵਿਰਾਟ ਕੋਹਲੀ ਨੂੰ ਆਪਣਾ ਆਦਰਸ਼ ਮੰਨਦਾ ਹੈ ਤੇ ਉਨ੍ਹਾਂ ਦੇ ਨਿਰੰਤਰ ਪ੍ਰਦਰਸ਼ਨ ਤੋਂ ਸਿੱਖਣਾ ਚਾਹੁੰਦਾ ਹੈ। ਮੈਨੂੰ ਉਨ੍ਹਾਂ ਦੀ ਇਹ ਗੱਲ ਬਹੁਤ ਪਸੰਦ ਹੈ ਕਿ ਉਹ ਕਦੇ ਵੀ ਆਪਣੀ ਪ੍ਰਕਿਰਿਆ ਤੋਂ ਭਟਕੇ ਨਹੀਂ ਤੇ ਲਗਾਤਾਰ ਉੱਚ ਪੱਧਰ ’ਤੇ ਪ੍ਰਦਰਸ਼ਨ ਕਰਦੇ ਰਹੇ ਹਨ। ਮੈਂ ਉਸ ਤੋਂ ਸਿੱਖਣਾ ਚਾਹੁੰਦਾ ਹਾਂ ਤੇ ਉਨ੍ਹਾਂ ਦੇ ਨਕਸ਼ੇ-ਕਦਮਾਂ ’ਤੇ ਚੱਲਣਾ ਚਾਹੁੰਦਾ ਹਾਂ। ਆਪਣੇ ਸਫ਼ਰ ਬਾਰੇ ਗੱਲ ਕਰਦਿਆਂ ਕਾਰਤਿਕ ਨੇ ਕਿਹਾ ਕਿ ਮੈਂ ਲਗਭਗ 10-12 ਸਾਲ ਦੀ ਉਮਰ ’ਚ ਕ੍ਰਿਕਟ ਖੇਡਣਾ ਸ਼ੁਰੂ ਕੀਤਾ ਸੀ, ਕ੍ਰਿਕਟ ਸਿਰਫ਼ ਇਸ ਲਈ ਸ਼ੁਰੂ ਹੋਈ ਕਿਉਂਕਿ ਮੈਨੂੰ ਇਹ ਖੇਡਣ ਦਾ ਮਜ਼ਾ ਆਇਆ, ਤੇ ਸਮੇਂ ਦੇ ਨਾਲ ਇਹ ਮੇਰਾ ਜਨੂੰਨ ਬਣ ਗਿਆ। ਇਸ ਲੀਗ ’ਚ ਮੇਰਾ ਉਦੇਸ਼ ਆਪਣਾ ਯੋਗਦਾਨ ਸਭ ਤੋਂ ਵਧੀਆ ਦੇਣਾ ਹੈ ਤੇ ਬਾਕੀ ਪਰਮਾਤਮਾ ਤੇ ਸਕਾਊਟਸ ’ਤੇ ਛੱਡਣਾ ਹੈ। ਮੈਂ ਸਿਰਫ਼ ਆਪਣੀ ਪ੍ਰਕਿਰਿਆ ’ਤੇ ਭਰੋਸਾ ਕਰਨਾ ਤੇ ਮੌਕੇ ਦਾ ਵੱਧ ਤੋਂ ਵੱਧ ਲਾਭ ਉਠਾਉਣਾ ਚਾਹੁੰਦਾ ਹਾਂ। ਕਾਰਤਿਕ ਨੇ ਲੁਧਿਆਣਾ ਲਾਇਨਜ਼ ਡਰੈਸਿੰਗ ਰੂਮ ’ਚ ਸਕਾਰਾਤਮਕ ਮਾਹੌਲ ਬਾਰੇ ਵੀ ਗੱਲ ਕੀਤੀ ਤੇ ਵਾਤਾਵਰਣ ਨੂੰ ਆਰਾਮਦਾਇਕ ਰੱਖਣ ’ਚ ਮਦਦ ਕਰਨ ਲਈ ਅਰਸ਼ਦੀਪ ਸਿੰਘ ਦੀ ਪ੍ਰਸ਼ੰਸਾ ਕੀਤੀ ਤੇ ਕਿਹਾ ਕਿ ਸਾਡੇ ਡ੍ਰੈਸਿੰਗ ਰੂਮ ’ਚ ਮਾਹੌਲ ਬਹੁਤ ਸਕਾਰਾਤਮਕ ਹੈ। ਅਰਸ਼ਦੀਪ ਇੱਕ ਬਹੁਤ ਚੰਗਾ ਮੁੰਡਾ ਹੈ ਤੇ ਅਸੀਂ ਸਾਰੇ ਮਜ਼ਾਕ ਕਰਦੇ ਹਾਂ ਤੇ ਚੀਜ਼ਾਂ ਨੂੰ ਹਲਕਾ ਰੱਖਦੇ ਹਾਂ, ਜੋ ਸਾਨੂੰ ਆਪਣੇ ਕ੍ਰਿਕਟ ਦਾ ਆਨੰਦ ਲੈਣ ’ਚ ਮਦਦ ਕਰਦਾ ਹੈ।