- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
Team India ਦੀ ਸ਼ਰਮਨਾਕ ਹਾਰ ਮਗਰੋਂ ਫੁੱਟਿਆ ਗੌਤਮ ਗੰਭੀਰ ਦਾ ਗੁੱਸਾ, ਬੱਲੇਬਾਜ਼ਾਂ ਨੂੰ ਪਾਈ ਝਾੜ; ਕਿਹਾ- 'ਕ੍ਰੀਜ਼ 'ਤੇ ਫਸ ਕੇ ਰਹਿ ਗਏ'
IND vs NZ : ਭਾਰਤੀ ਟੀਮ ਨੂੰ ਮਾਊਂਟ ਮੌਂਗਾਨੁਈ 'ਚ 334 ਦੌੜਾਂ ਦਾ ਵਿਸ਼ਾਲ ਟੀਚਾ ਮਿਲਿਆ ਸੀ, ਜਿਸ ਦੇ ਜਵਾਬ 'ਚ ਭਾਰਤ ਦੀ ਪੂਰੀ ਟੀਮ ਸਿਰਫ਼ 89 ਦੌੜਾਂ 'ਤੇ ਸਿਮਟ ਗਈ। ਕੀਵੀ ਗੇਂਦਬਾਜ਼ਾਂ ਦੇ ਸਵਾਲਾਂ ਦਾ ਕਿਸੇ ਵੀ ਭਾਰਤੀ ਬੱਲੇਬਾਜ਼ ਕੋਲ ਜਵਾਬ ਨਹੀਂ ਸੀ। ਇਸ ਜਿੱਤ ਨਾਲ ਨਿਊਜ਼ੀਲੈਂਡ ਨੇ ਸੀਰੀਜ਼ 'ਚ ਆਪਣੀ ਪਹਿਲੀ ਜਿੱਤ ਦਰਜ ਕੀਤੀ।
Posted By Seema Anand
Publish Date: Fri, 13 Nov 2026 05:02 PM (IST)
Updated Date: Fri, 13 Nov 2026 05:07 PM (IST)
ਸਪੋਰਟਸ ਡੈਸਕ, ਨਵੀਂ ਦਿੱਲੀ : ਭਾਰਤੀ ਟੀਮ ਨੂੰ ਨਿਊਜ਼ੀਲੈਂਡ ਖ਼ਿਲਾਫ਼ ਚੌਥੇ ਵਨਡੇ 'ਚ 244 ਦੌੜਾਂ ਨਾਲ ਕਰਾਰੀ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਇਸ ਸ਼ਰਮਨਾਕ ਹਾਰ ਤੋਂ ਬਾਅਦ ਟੀਮ ਇੰਡੀਆ ਦੇ ਮੁੱਖ ਕੋਚ ਗੌਤਮ ਗੰਭੀਰ ਨਾਰਾਜ਼ ਨਜ਼ਰ ਆਏ। ਉਨ੍ਹਾਂ ਦਾ ਗੁੱਸਾ ਭਾਰਤੀ ਬੱਲੇਬਾਜ਼ਾਂ 'ਤੇ ਫੁੱਟਿਆ। ਉਨ੍ਹਾਂ ਨੇ ਖ਼ਰਾਬ ਬੱਲੇਬਾਜ਼ੀ ਨੂੰ ਹਾਰ ਦਾ ਕਾਰਨ ਦੱਸਿਆ।
ਭਾਰਤੀ ਟੀਮ ਨੂੰ ਮਾਊਂਟ ਮੌਂਗਾਨੁਈ 'ਚ 334 ਦੌੜਾਂ ਦਾ ਵਿਸ਼ਾਲ ਟੀਚਾ ਮਿਲਿਆ ਸੀ, ਜਿਸ ਦੇ ਜਵਾਬ 'ਚ ਭਾਰਤ ਦੀ ਪੂਰੀ ਟੀਮ ਸਿਰਫ਼ 89 ਦੌੜਾਂ 'ਤੇ ਸਿਮਟ ਗਈ। ਕੀਵੀ ਗੇਂਦਬਾਜ਼ਾਂ ਦੇ ਸਵਾਲਾਂ ਦਾ ਕਿਸੇ ਵੀ ਭਾਰਤੀ ਬੱਲੇਬਾਜ਼ ਕੋਲ ਜਵਾਬ ਨਹੀਂ ਸੀ। ਇਸ ਜਿੱਤ ਨਾਲ ਨਿਊਜ਼ੀਲੈਂਡ ਨੇ ਸੀਰੀਜ਼ 'ਚ ਆਪਣੀ ਪਹਿਲੀ ਜਿੱਤ ਦਰਜ ਕੀਤੀ।
ਬੱਲੇਬਾਜ਼ਾਂ 'ਤੇ ਫੁੱਟਿਆ ਗੰਭੀਰ ਦਾ ਗੁੱਸਾ
ਮੈਚ ਤੋਂ ਬਾਅਦ ਪ੍ਰੈੱਸ ਕਾਨਫਰੰਸ ਦੌਰਾਨ ਜਦੋਂ ਗੰਭੀਰ ਤੋਂ ਵੌਬਲ ਸੀਮ ਦੇ ਖ਼ਿਲਾਫ਼ ਭਾਰਤੀ ਬੱਲੇਬਾਜ਼ਾਂ ਦੇ ਸੰਘਰਸ਼ ਬਾਰੇ ਪੁੱਛਿਆ ਗਿਆ ਤਾਂ ਮੁੱਖ ਕੋਚ ਨੇ ਬੱਲੇਬਾਜ਼ੀ ਦੀ ਤਕਨੀਕ ਬਾਰੇ ਗੱਲ ਕਰਨ ਦੀ ਬਜਾਏ ਹਾਲਾਤ ਮੁਤਾਬਕ ਖ਼ੁਦ ਨੂੰ ਢਾਲਣ ਦੀ ਲੋੜ 'ਤੇ ਜ਼ੋਰ ਦਿੱਤਾ। ਗੰਭੀਰ ਨੇ ਕਿਹਾ, 'ਮੈਂ ਤਕਨੀਕ ਬਾਰੇ ਜ਼ਿਆਦਾ ਗੱਲ ਨਹੀਂ ਕਰਾਂਗਾ। ਉੱਥੇ ਗੇਂਦ ਬਹੁਤ ਜ਼ਿਆਦਾ ਸਵਿੰਗ ਨਹੀਂ ਹੋ ਰਹੀ ਸੀ। ਗੇਂਦ ਦੀ ਮੂਵਮੈਂਟ ਦਾ ਸਾਹਮਣਾ ਕਰਨਾ ਬੱਲੇਬਾਜ਼ਾਂ ਦਾ ਕੰਮ ਹੈ। ਸੀਮ ਨਾਲੋਂ ਜ਼ਿਆਦਾ ਸਾਡੇ ਲਈ ਗੇਂਦਬਾਜ਼ੀ ਦੇ ਖੇਤਰ ਅਤੇ ਲੈਂਥ ਮੁਸ਼ਕਲ ਬਣੇ। ਅਸੀਂ ਕ੍ਰੀਜ਼ 'ਤੇ ਹੀ ਫਸ ਕੇ ਰਹਿ ਗਏ।'
ਕੋਈ ਵੀ ਗੇਂਦ ਐਸੀ ਨਹੀਂ ਹੁੰਦੀ ਜਿਸ ਨੂੰ ਖੇਡਿਆ ਨਾ ਜਾ ਸਕੇ
ਮੈਟ ਹੈਨਰੀ ਨੇ ਇਸ ਮੈਚ 'ਚ 27 ਦੌੜਾਂ ਦੇ ਕੇ ਛੇ ਵਿਕਟਾਂ ਹਾਸਲ ਕੀਤੀਆਂ। ਉਨ੍ਹਾਂ ਨੇ ਪਹਿਲੇ ਹੀ ਓਵਰ 'ਚ ਭਾਰਤ ਨੂੰ ਤਿੰਨ ਵੱਡੇ ਝਟਕੇ ਦਿੱਤੇ। ਹਾਲਾਂਕਿ, ਗੰਭੀਰ ਨੇ ਹੈਨਰੀ ਦੀ ਗੇਂਦਬਾਜ਼ੀ ਨੂੰ ਅਜਿਹੀ ਗੇਂਦਬਾਜ਼ੀ ਮੰਨਣ ਤੋਂ ਸਾਫ਼ ਇਨਕਾਰ ਕਰ ਦਿੱਤਾ, ਜਿਸ ਨੂੰ ਖੇਡਿਆ ਹੀ ਨਾ ਜਾ ਸਕੇ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਭਾਰਤ ਦੀ ਤਜਰਬੇਕਾਰ ਬੱਲੇਬਾਜ਼ੀ ਲਾਈਨਅੱਪ ਕੋਲ ਕੀਵੀ ਗੇਂਦਬਾਜ਼ ਦੀਆਂ ਚੁਣੌਤੀਆਂ ਦਾ ਜਵਾਬ ਹੋਣਾ ਚਾਹੀਦਾ ਸੀ।
ਗੰਭੀਰ ਨੇ ਕਿਹਾ, 'ਅੰਤਰਰਾਸ਼ਟਰੀ ਕ੍ਰਿਕਟ 'ਚ ਕੋਈ ਵੀ ਗੇਂਦ ਅਜਿਹੀ ਨਹੀਂ ਹੁੰਦੀ, ਜਿਸ ਨੂੰ ਖੇਡਿਆ ਨਾ ਜਾ ਸਕੇ। ਮੈਟ ਹੈਨਰੀ ਨੇ ਚੰਗੇ ਖੇਤਰਾਂ 'ਚ ਗੇਂਦਬਾਜ਼ੀ ਕੀਤੀ, ਪਰ ਸਾਨੂੰ ਉਸ ਦਾ ਸਾਹਮਣਾ ਕਰਨਾ ਚਾਹੀਦਾ ਸੀ। ਤੁਹਾਨੂੰ ਹਮੇਸ਼ਾ 90 ਦੌੜਾਂ ਦੇ ਆਸ-ਪਾਸ ਸਿਮਟ ਜਾਣ ਦਾ ਡਰ ਰਹਿੰਦਾ ਹੈ। ਇਹ ਹਾਲਾਤ ਵਿਸ਼ਵ ਕੱਪ 'ਚ ਮਿਲਣ ਵਾਲੇ ਹਾਲਾਤਾਂ ਵਰਗੇ ਹਨ। ਅਸੀਂ ਪਿਛਲੇ ਮੈਚ 'ਚ ਵੀ ਸੱਤ ਵਿਕਟਾਂ ਗੁਆ ਦਿੱਤੀਆਂ ਸਨ। ਇਹ ਇਕ ਸਮੱਸਿਆ ਹੈ।'
ਸੀਰੀਜ਼ ਜਿੱਤਣ ਦਾ ਆਖ਼ਰੀ ਮੌਕਾ
ਭਾਰਤੀ ਟੀਮ ਨੇ ਮੈਚ ਦੌਰਾਨ ਵਿਲ ਯੰਗ ਨੂੰ ਦੋ ਜੀਵਨਦਾਨ ਦਿੱਤੇ। ਇਸ ਤੋਂ ਬਾਅਦ ਯੰਗ ਨੇ ਸ਼ਾਨਦਾਰ ਸੈਂਕੜਾ ਲਗਾਇਆ। ਇਹੀ ਕਾਰਨ ਰਿਹਾ ਕਿ ਨਿਊਜ਼ੀਲੈਂਡ ਵੱਡਾ ਸਕੋਰ ਖੜ੍ਹਾ ਕਰਨ 'ਚ ਕਾਮਯਾਬ ਰਿਹਾ। ਦੂਜੇ ਪਾਸੇ, ਮੈਟ ਹੈਨਰੀ ਨੇ ਛੇ ਵਿਕਟਾਂ ਲੈ ਕੇ ਭਾਰਤੀ ਬੱਲੇਬਾਜ਼ੀ ਦੀ ਕਮਰ ਤੋੜ ਦਿੱਤੀ। ਇਸ ਹਾਰ ਦੇ ਬਾਵਜੂਦ ਭਾਰਤੀ ਟੀਮ ਸੀਰੀਜ਼ 'ਚ 2-1 ਨਾਲ ਅੱਗੇ ਹੈ। ਉਸ ਕੋਲ ਸੀਰੀਜ਼ ਜਿੱਤਣ ਦਾ ਇਕ ਹੋਰ ਮੌਕਾ ਹੋਵੇਗਾ। ਹਾਲਾਂਕਿ, ਆਖ਼ਰੀ ਮੁਕਾਬਲਾ ਵੀ ਇਸੇ ਮੈਦਾਨ 'ਤੇ ਖੇਡਿਆ ਜਾਣਾ ਹੈ, ਇਸ ਲਈ ਭਾਰਤ ਲਈ ਜਿੱਤ ਹਾਸਲ ਕਰਨਾ ਆਸਾਨ ਨਹੀਂ ਹੋਵੇਗਾ।